BUTUAN CITY – Gibana-bana ni Bradley Asa, ang Communication and Dissemination Officer sa Papua New Guinea Red Cross Society nga mu-abot sa siete ngadto sa 8-mil ka mga inbibidwal ang apektado sa lapad nga landslides nga natigayon sa Enga Province.
Sa eksklusibong pakighinabi sa Bombo Radyo Butuan, gipadayag sa opisyal nga unom ka adlaw na ang nakalabay sukad natigayon ang insidente ug posibeng 42-porsiento sa populasyon nga apektado, nag-edad og 60-ayos pataas.
Kapin na usab sa usa ka libo ka mga panimalay ang natabunan sa midahiling lapok nga duna’y apil nga mga dagkong bato. Nakigtambayayong matud pa sila sa kasundaluhan ug uban pang mga hingtungdang ahensya sa gobyerno aron mapadali ang ilang recovery operation tungod sa kadaghan sa mga balay, imprastraktura sama sa kadalanan, mga tunghaan ug uban pa ang nangadamyos.
Sa pagkutlo niini nga balita, unom pa ka mga patay’ng lawas ang ilang narekober apan gila-uman nila ang taas nga ihap samtang nagpadayon pa ang search and rescue operation.
Dakong hagit matud pa sa operasyon ang padayong pagtay-og sa yuta nga ilang mabati.
