BUTUAN CITY – Pabiling naka-heightened alert karon ang Tel Aviv sa Israel human ang sunod-sunod nga drone ug missile attacks sa Iran niadtong Dominggo, Abril 14.
Sa eksklusibong pakighinabi sa Bombo Radyo Butuan, gibutyag ni Bombo international correspondent Maristine Solomon, nga bisan og wala’y mga bomba nga nakasulod sa ilang lugar apan gikulbaan gihapon silang mga residente apil na ang mga overseas Filipino workers.
Kini tungod kay dihang mihimo na og retaliatory attacks ang Iran, wala usa’y hunong ang pagpalupad og mga fighter jets sa Israel diha sa kawanangan aron lang ma-intercept ang mga rockets, drones ug missiles nga gipangtira sa Iran.
Bisan matud pa niini nga panghitabo, padayon ang ilang inadlaw-adlaw nga trabaho tungod kay kung duna na’y ipatingog nga alarm, otomatiko na silang mupasilong sa mga bomb shelters sa dakbalay diin sila nagtrabaho.
Samtang kadtong ma-abtan sa dalan nga nagbaktas o kaha anaa sulod sa sakyanan, kinahanglan nang mangita og lugar nga katagu-an higayong madunggan na ang sirina nga ipatungog sa lugar diin gila-umang tugpahan sa mga bomba, missiles ug uban pa.
Bisan og kabado apan wala matud pa sa iyang huna-huna ang mupa-uli sa Pilipinas tungod kay dili matud pa niya makita dinhi sa nasud ang iyang sweldo nga ginadawat sa Israel.
Aminado kining mupa-uli na unta siya uban sa una nang nanguli nga mga Pinoy dihang gi-atake sa mga militanteng Hamas ang Israel, apan sama sa uban, nagpabilin siya sa maong nasud bitbit ang pagpaka-isog bisan na og samtang nagkamulo og interview ang Bombo Radyo, nabati pa sa ibabaw sa nahimutangan niya ang mga fighter jets.
