BUTUAN CITY – Gisurender na sa Ukraine-born nga mananaog sa Miss Japan beauty pageant ang iyang korona human nabulabog sa usa ka tabloid report nga duna siya’y relasyon sa usa ka minyo nga lalaki.
Ang 26-anyos nga si Karolina Shiino, kinsa gikoronahan og Miss Japan ning mi-aging duha ka semana, mi-ani og mga batikos tungod sa iyang kaliwatan. Bisan og ang uban midawat sa pagkorona kaniya isip usa ka naturalized citizen apan ang uban mipalag tungod kay wala matud pa niini girepresentar ang traditional nga Japanese beauty ideals.
Sa artikulo sa Shukan Bunshun, gika-ingon nga nakarelasyon ni Ms Shiino ang usa ka minyo nga influencer ug doctor kondiin gidepensahan pa siya sa mga pageant organizers sa rasong wala kini masayod nga minyo ang maong lalaki nga si Takuma Maeda.
Apan kaganina, gipadayag sa mga organizers nga mikumpisal kanila si Shiino nga nasayod siyang minyo ang lalaki ug duna’y pamilya, rason nga ilang gidawat ang iyang title resignation.
Tungod niini, magpabiling bakante ang Miss Japan title sa tibuok tuig bisan pa manb og duna kini pipila ka mga runner-ups.
