BUTUAN CITY – Gihingusgan karon sa Public Services Labor Independent Confederation kon PS-LINC nga i-apil sa propose 2024 national budget ang usbaw sa suhulan sa mga empleyado sa gobyerno. Kini human nila nakita sa proposed budget nga wala’y probisyon alang niini rason nga ilang gipanawagan nga i-apas kini aron ma-apil sa budget deliberation.
Sa eksklusibong interview sa Bombo Radyo Butuan, gipadayag ni Annie Enriquez-Geron, presidente sa Public Services Labor Independent Confederation, gibarugan nilang kinahanglang hatagan og prayuridad sa Marcos Jr. administration ang paghatag og usbaw sa suhulan sa tanang empleyado sa gobyerno tungod sa kagamay lang sa ika-upat ug katapusang tranch sa pagpatuman ning tuiga, sa Salary Standardization Law kon SSL-5.
Nawala na matud pa ang bili sa SSL tungod sa pagsaka sa inflation rate ug pagtaas sa presyo sa mga nag-unang palaliton apil na sa produktong petrolyo.
Gawas sa ilang grupo, nagduso usab og susamang sugyot ang pipila ka partylists sama sa Allied of Concerned Teachers kon ACT ug uban pa tungod sa kalayo na sa gintang sa suhulan karon sa mga government employees kondiin ang salary grade 1 nga 13-mil pisos, dili na ikasarang sa presyo sa mga palaliton karon.
Giklaro usab niini nga ang ilang panawagang usbaw sa suhulan dili lang alang sa mga plantilla employees kondili apil na sa mga casual, job order, contract of service ug contractual.
