BUTUAN CITY – Hugot nga ginegar ni kanhi Police Regional Office kon PRO-13 regional director PBGeneral Pablo Labra II ang pagbandera sa iyang pangalan nga usa sa tulo ka mga heneral nga gi-alegahang nalambigit sa illegal drug activities sa nasud rason nga gidawat ni Pangulong Ferdinand ‘Bongbong’ Marcos Jr. ang iyang courtesy resignation.
Sa eksklusibong pakighinabi sa Bombo Radyo Butuan, gipadayag ni Gen. Labra nga gi-isyuhan siya og relieve order kondiin gitu-uhan pa niyang alang kini sa saktong panahon sa iyang pagserbisyo apan alang na diay sa iyang pagka-relieve nga wala man lang matud pa mu-agi sa due process.
Gikatingla matud pa niya ang pagkalambigit sa iyang pangalan sa ilegal nga druga kondiin iya pang gikwestyon niini si Interior and Local Government Secretary Benjamin ‘Benhur’ Abalos Jr kinsa wala usab matud pa’y natubag kaniya tungod kay nakita matud pa sa iyang mga kadagkuan ang iyang matinud-anong trabaho.
Posible matud pa nga ang malisyusong report, bunga ra sa pamulitika sa mi-aging administrasyon sa mga lugar nga iyang naserbisyuhan adiser nalabog dinhi sa Caraga Region sama sa Cebu ug Bangsamoro Autonomous Region in Muslim Mindanao kon BARMM.
Misaad ang heneral nga muhimo siya og legal moves aron malimpyuhan ang iyang pangalan ilabina nga na-clear na kini sa gihmong imbestigasyon sa Senado niadtong panahon ni kanhi Pangulong Rodrigo Duterte.
Kini ilabina nga wala siya’y kutay sa mga police units nga muhimo og mga illegal drugs operations human siya gihimong police attache sa Malaysia. Dungan niini ang paghagit niya sa mga mipasipala sa iyang bansagon nga imbetigahan siya og maayo aron makita nila ang tinuod niyang gihimo sa iyang pagpamulis.
Kamatu-uran sa iyang ka-inosente sa maong akusasyon ang wala’y kasong mapasaka batuk kaniya.
