BUTUAN CITY – Misaka na sa tulo ang patay sa pagdaro sa sakyanan sa nag-vigil sa may P-3, Barangay Doongan ning syudad sa Butuan kagahapon sa alas 4:00 sa kaadlawon. Kini human mitaliwan na usab ang usa ka 17-anyos nga una nnag gideklarang critical.
Naila ang biktima nga si Jay Villamor Rosales nga residente usab sa susamang lugar. Una nang gideklarang namatay sila Glen Gabriel, 34-anyos, ulitawo ug Richard Dalogdog Villamor, 27-anyos, dunay live-in partner , ug parehong nanimuyo sa P-3, Brgy.Doongan ning syudad.
Mahinumduman nga samtang nagtindog-tindog ang mga biktima sa maong dapit tungod sa pagtambonga sa lamay, kalit lang kining gidaru sa Toyota Hilux Pick-up color gold nga dunay plate number nga TOD-814 og gimanehuan ni Alexcel Sanchez Timbang, 37-anyos, usa ka Marketing Supervisor sa usa ka Liquor Company nga naka-base sa Cabadbaran City, ug residente sa P-16, Upper Mandacpan, Barangay San Vicente ning syudad sa Butuan.
Walay nahiagum nga samad ang drayber sa Hilux tungod kay kini naka- setbelt niadtong higayona ug naluwas sa airbag sa iyang sakyanan.
Sa inisyal nga imbestigasyon, gikan pa sa kompanya ang suspek sa dihang nakatagtilaw samtang nagmaneho diin nakabig ang manubela hinungdan sa maong hitabo.
Nakaditine na karun sa BUtuan City Police Station-2 ang drayber samtang gikustudiya usab ang nalambigit nga sakyanan.
