BUTUAN CITY – Target karon sa sepak takraw Philippine national team nga makakuha og tulo ngadto sa upat ka mga gold medals sa men’s double, men’s team double ug men’s hoop events sa Southeast kon SEA Games nga himuon sa Cambodia.
Sa eksklusibong pakighinabi sa Bombo Radyo Butuan, gipadayag ni team captain Jason Huerte nga sa pagkakaron, andam na silang mudula bisan unsang orasa tungod kay naka-train sila pagdula sa buntag ug sa hapon.
Gawas pa, dili usab dakong problema kanila ang klima tungod kay mao-mao ra ang klima sa Thailand, Pilipinas ug Cambodia.
Bisan og ilang gibansay og maayo sa kategoriyang ilang apilan ang mga national athletes apan dili gihapon sila mukumpyansa tungod kay sama sa Pilipinas, ang best of the bests usab ang gipadala sa ubang mga nasud nga ilang maka-agbat.
Sa pagkakaron , anaa na sa peak sa ilang tagsa-tagsa ka skills ang mga sepak takraw national athletes ug samtang ania na sila sa Pilipinas, maintain lang gihapon ang ilang training hangtud sa pagsalmot na nila sa SEA Games.
