BUTUAN CITY – Mas gipahugtan pa ang seguridad sa mga tourist spots sa Agusan Del Norte alayon na sa gila-umang pagdasok sa mga turista sunod semana subay na usab sa pagbalaan sa Semana Santa diin taas ang panahon ang walay trabaho ug eskwela.
Sigon ni Police Lt. Honorio Campos, tigpamaba sa Agusan Del Norte Police Provincial Office, naghatag na og direktiba si Police Provincial Director Police Col. Filemon Pacios ngadto sa mga Municipal og City Police Stations lakip na ang mobile force company nga mag-deploy og mga personahe sa matag-area ilabina sa mga tourist spots.
Sumala sa opisyal, mihimo og mga pagbansay ang kapulisan pinaagi sa Tourist Oriented Police for Community Order and Protection kon TopCop aron paghatag og seguridad sa mga turista nga mu-abot sa probinsiya.
Dinhi gitudluan ang mga partisipante sa gikinahanglang security measures nga ipatuman lakip na ang paghatag og first aid.
Pagbutyag pa ni Police Lt. Campos, ang lungsod sa Carmen maoy dunay pinakadaghang turista nga mangabot base na usab sa datus gikan sa tourism office.
Gitambagan sa opisyal ang mga turista nga kinahanglan silang magpalista ugaling muabot sa mga bisitahon nga tourism spot pinaagi sa pagdool sa mga gibutang nga tourism assistance desk.
