BUTUAN CITY – Giklaro ni Police Captain Ramon Atenta, Hepe sa Butuan City Police Station-4 nga personal nga kasuko ang motibo sa pagpatay sa usa ka icedrop vendor sa alas 7:30 kagabii sa may Emelda Mar, Manila de Bugabus ning siyudad sa Butuan og dili tulis.
Kini human nakumpirma nga anaa lang ang kwarta og pitaka sa biktima nga si Cezario Miano, 63-anyos nga taga Purok-7A, Barangay Bading ning siyudad sa Butuan.
Sumala pa ni Police Captain Atenta nga duna na silay nakuhang usa sa tulo ka mga suspetsado nga nailang si Romeo Ramos, 41-anyos nga taga Purok-4, Lawan-lawan, lungsod sa Las Nieves, Agusan Del Norte.
Saysay pa sa hepe nga base sa ilang pakighinabi ngadto sa suspek, nagkabikil matud pa sila sa biktima sa dihang nag-inom og ilimnong makahubog diin samtang nagbiyahe na ang biktima, gigukod kini sa mga suspek sakay ang laing single motor og gibabagan.
Dinhe na giluba og gipanigbas ang biktima nga nakahiagum og samad sa nagkadaiyang parte sa lawas lakip na ang samad sa liog rason sa hinanaling kamatayon.
Sa kasamtangan, padayon pa ang pagpangeta sa laing duha ka mga suspetsado nga nakasibat human sa gihimong kremin.
