BUTUAN CITY – Gitoohang selos ang motibo sa pagpamusil-patay sa usa ka pulis ngadto sa magti-ayon bandang alas 8:00 kagabii sa may Princess 1 Subdivision, Purok-6, Barangay Villakananga, ning siyudad sa Butuan.
Naila ang mga biktima nga sila Mary Ann Añasco, 51-anyos, og Charlie Añasco, 45-anyos, usa ka RCH Trading Petron Agent, og parehong residente sa maong dapit.
Samtang ang suspek nailang si Police Staff Master Sergeant Darwin Plaza Nolasco, 46-anyos, miyembro sa Philippine National Police nga nadestino sa Dinagat Municipal Police Station sa probinsiya sa Dinagat Island og residente sa Block 2 Lot 10, Princess 1 Subdivision, Villakananga, Butuan City.
Base sa impormasyon gikan sa Butuan City Police Station-1, gelayon nilang girespondihan ang tawag mahitungod sa pagpamusil og didto na-abtan ang wala nay kinabuhi nga mga biktima human nakahiagum ug mga samad pinusilan sa kalawasan sulod sa sakyanan nga itom nga Toyota Vios nga nagtangag ssa plaka numero KGH 381.
Naaresto usab sa kapulisan ang suspek diin lakip sa nakuha ang isyu kaniya nga armas nga gitoohang maoy gigamit sa kremin.
Sa karun padayon pa ang lawom nga imbestigasyon mahitungod sa panghitabo.
