BUTUAN CITY – Gibasura sa Sandiganbayan ang giduso nga motion for reconsideration o motion for no-trial ni kanhi Butuan City Mayor Ferdinand Amante Jr. aron unta mabaliktad ang hukom sa Sandiganbayan 3rd Division nga 16 ka tuig nga pagkabilanggo.
Kini tungod kay wala matud pa’y balidong rason aron amendahan ang ilang desisyon nga nagkonbikto kaniya ning mi-aging tuig.
Sa siyam ka palid nga resolusyong gipagawas niadtong Enero 19, gibarugan sa Third Division sa anti-graft court nga ang mga argumento ug mga isyung gi-isa ni Amante, pulos mga karaan ug subli lang gigamit taliwa nga naresolba na kini sa korte.
May kalabutan kini sa paglapas niini sa Sections 3(e) ug 3(g) sa Republic Act 3019 kon mas nailang Anti-Graft and Corrupt Practices Act tungod sa procurement ug shipment sa usa ka depektusong computerized tomography kon CT scan machine nga nagkantidad og 15-milyunes pesos nga tungod kay dili magamit, gibalik kini ngadto sa Estados Unidos.
Una nang gibutyag sa abogado sa kanhi mayor nga si Atty. Froi Montero nga gikan sa perpetual disqualification nga makahawid og katungdanan sa gobyerno, gihimo na lang kining usa ka bulan nga salary penalty.
Ang nasangpit nga disesyon sa Court of Appeals maoy ilang gidala sa Sandiganbayan 3rd Division ug karong wala sila gipaboran, ila matud pa kini isang-at sa korte suprema aron hatagan og katin-awan ang maong kaso.
