BUTUAN CITY – Gikumpirma ni Bureau of Fire Protection kon BFP-Butuan City investigator FO3 Ben Sergio Pelletero nga gibana-banang mukabat sa 25-milyunes pesos ang damyos sa sunog nga milamoy sa una ug ikaduhang andana sa Butuan City Colleges building sa may Montilla Boulevard corner JC Aquino Avenue sakop sa Brgy. Tandang Sora ning siyudad kaganinang alas-tres sa kaadlawon.
Sa eksklusibong pakighinabi sa Bombo Radyo Butuan, gipadayag sa opisyal nga base sa ilang pakighinabi ngadto sa caretaker sa maong tunghaan nga si Jimboy Cuvillar, nagsugod matud pa ang kalayo sa entablado nga bahin sa maong tunghaan kansa paspas nga mikanat rason nga nalamoy usab ang laing kasikbit nga mga stalls niini.
Mi-abot sa 4th alarm ang sunog human nga miresponde ang tulo ka mga fire trucks gikan sa City Disaster Risk Reduction and Management Office (CDRRMO), tulo usab gikan sa Agusan Filipino-Chinese Fire Volunteer Brigade Inc. Butuan City, tag-usa gikan sa Ampayon Sub-Station ingon man sa lungsod sa Magallanes, Buenavista ug sa Cabadbaran City.
Sila ang mi-abag sa duha ka yunit sa Butuan City Central Fire Station rason nga nadeklarang kontrolado ang kalayo pasado alas-4:30 sa sayong buntag ug alas-5:20 na usab nadeklara ang fire-out.
Ang ila matud pang nakloketang mga ebidensya, ila pang ipadala ngadto sa ilang National Headquarters aron makuha unya nila ang resulta sa himuong pagsusi sa ilang arson laboratory.
