BUTUAN CITY – Kampante si General George Banzon, commander sa 901st brigade, Philippine Army nga usa ka taas nga lider sa New People’s Army ang nakaplagang patay’ng lawas sa bukirang parte sa Barangay Cuyago, Jabonga, Agusan Del Norte.
Sumala pa ni General Banzon nga base sa sirkumstansiya sa nakuhang impormasyon og discription sa patay’ng lawas, nihaom ang nakitang lawas sa pagkatawo ni Rolando Leyson jr nga nailang Junjun sa iyang pamilya og kaparyentihan og nagdala sa Alyas nga si Ka Edroy sa kalihukan.
Si Ka Edroy matud pa ang secretary sa Guerille Front 16 sa New People’s Army og maoy nagmandu sa mga rebelding naglihok sa probinsiya sa Agusan Del Norte og kasikbit nga Surigao Del Norte.
Pasabot pa ni General Banzon nga niatong Setyembre 14 ning tuig,naka-engkuwentro sa kasundaluhan ang grupo ni Ka Edroy diin dunay nadawat nga impormasyon nga dunay samaron sa walhong grupo og nakuha ang improvised sniper rifle nga mao matud pay mag-alalay kang Ka Edroy.
Sa walay hunong nga pursuit operation, nakaplagan ang patay’ng lawas pagka-Setyembre 20, kansa gibiyaan lang sa mga kaubanan og anaa na sa state of decomposition. Gane, dunay nakita matud pang nakapatong nga bayawak nga nakapatong sa patay’ng lawas.
Kaganina lang usab hingpit nga nakuha ang patay’ng lawas sa tabang sa Agusan Del Norte POlice Provincial Office diin giadtuan sa mga personahe sa Scene of the Crime Operatives kon SOCO ang lugar.
Sa karun, giproseso na ang patay’ng lawas alang sa hingpit nga pag-ila og aron sa ingon mapahibalo ang kabanay niini og mahatagan sa disenteng lubong./
