BUTUAN CITY – Wala’y laing nakitang hinungdan ang pamilya sa 14-anyos nga bayong-bayong sa iyang paghikog-patay kagahapon sa Purok 2, Brgy. Tagabaca ning siyudad kondili tungod lang sa wala mahatagi og balon sa iya untang pag-eskwela.
Sa eksklusibong pakighinabi sa Bombo Radyo Butuan, gipadayag ni Lalaine, ig-agaw sa biktima, nga ning mi-agi pang adlaw nag-wild na kini ug nagsige na matud pa og pamalikas base na usab sa saysay sa inahan niini.
Posible matud pang napuno na sa iyang dili maayong gibati ang biktima ilabina nga kanunay matud pa kining yawyawan sa iyang amahan higayong mahubog.
Na-anad matud pa kini niadtong bata pa uban sa iyang maguwang nga lalaki nga hatagan sa ilang ginikanan sa ilang gusto kansa karon wala na nila matagamtami nga posibleng maoy nakapaburyong sa utok niini.
Kini ilabina nga dili kini mahatagan kanunay og bawon tungod kay sa pamasahe pa lang padulong sa eskwelahan ug pa-uli, kinahanglan na niining makabaton og 100-pesos.
Dugang pa ni Lalaine, wala matud pa’y laing ma-istoryahan ang biktima kung duna kini problema sukad namalhin na og puyo tuga-tunga sa basakan human nga gipasa-op ang iyang ginikanan.
Sukwahi matud pa kaniadto nga mahimo kining muduol sa ilang balay diin duna kini maka-istorya.
