BUTUAN CITY – Gi-ulan og mga pahasubo ang pag-abot na sa Lamitan City, Basilan kaganina pang alas-8:15 sa buntag, sa patay’ng lawas ni kanhi Lamitan City Mayor Rose Furigay, insaktong usa ka semana human kini gipusil-patay ka-uban ang iyang executive assistant nga si Victor Capistrano sulod mismo sa Ateneo de Manila University sa Quezon City.
Gawas sa mayor, patay usab ang usa ka security guard sa unibersidad.
Gisakay ang patay’ng lawas sa mayor sa usa ka navy vessel gikan sa Zamboanga City padulong sa Lamitan City nga gipangunahan sa bana niining si incumbent Lamitan City Mayor Oric Furigay.
Gatusang mga supporters ug mga constituents sa Lamitan ang misugat sa pag-abot sa patay’ng lawas sa biktima sa ilang lugar.
Bitbit sa mga supporters ang ilang placards nga nangayo og hustisya sa pagkamatay sa kanhi mayor.
