BUTUAN CITY – Hilabihan ang kalipay nga gibati sa mga Overseas Filipino Workers kon OFW sa dihang nabati ang ilang ka-importansiya atol sa State of the Nation Address kon SONA ni Pangulong Ferdinand Bongbong Marcos jr kagahapong adlawa.
Sa eksklusibong pakighinabi sa Bombo Radyo Butuan ngadto kang Marjorie Majorenos direkta gikan sa Washington DC, USA, gibutyag niining nakahilak siya dihang nadungog ang pag-ila sa pangulo sa papel sa mga OFWs ilabina sa kadaghan sa mga problema nga ilang gi-atubang.
Partikular nga gikalipay ni Majorenos ang gitumbok ni Pangulong Marcos nga kung kaniadto, sila ang modool sa gobyerno, karun ang gobyerno na ang mupadool kanila ilabina sa langay kaayo nga pagproseso aron makagawas na sila sa nasud.
Nakita nila ang gugma ni Pangulong Bongbong Marcos ngadto sa mga OFWs rasong lakip ang ilang mga pamilyang nahabilin sa Pilipinas, seguradong apil sa nalipay.
Gikalipay usab nila ang pagtudlo kang Susan ‘Toots’ Ople isip secretary sa Department of Migrant Workers kon DMW nga bisan niadtong wala pa kini sa posisyon mitabang na ngadto kanila.
