BUTUAN CITY – Nanawagan ang kapulisan sa San Francisco, Agusan Del Sur sa bisan kinsang dunay kasayuran sa mga suspetsado nga mihimo sa pagpusil-patay sa usa ka babaye, nga gelayong itaho sa ilang buhatan aron sa ingon mahatagan og hustisya ang pamilya niini.
Gipaneguro pa sa otoridad nga itago nila ang identity sa mga magsumbong nga indibidwal. Mahinumdumang natigayon ang pagpamusil pasado alas 11:00 sa buntag sa nakalabay nga adlaw sa may Purok-1A, Brgy. 1, San Francisco, Agusan del Sur.
Naila ang biktima nga si Merofe B. Gallego, 43-anyos, menyu og residente sa Purok-2, Brgy. Bayugan 3, Rosario, Agusan del Sur.
Nailo sa biktima ang duha niya ka mga minor-de-edad nga anak. Base sa pamahayag sa bana, walay kaaway ang biktima kansa wala usab nalambigit sa bisan unsang kagubot.
Sa taho sa San Francisco Municipal Police Station , sakay ang biktima sa pampasaheroang tricycle sa dihang kalit nga gipusil sa motorcycle-riding suspects sa makadaghang higayon nga miresulta sa hinanaling kamatayon. Daling misibat usab ang mga suspek nga bitbit na niini ang sling bag sa biktima.
Narekober sa nahitaboan ang 6 ka basyo sa wala pa matumbok nga armas. Sa karun padayon ang lawom nga imbestigasyon sa kapulisan diin gilantaw ang tanang anggulo aron matumbok ang motibo sa pagpamusil.
