BUTUAN CITY – Gikalipay karon ni Dra. Esther Cardeño, hepe sa Regional Animal Disease Diagnostic Laboratory sa Department of Agriculture-Caraga nga gibutangan na sila og molecular laboratory.
Sa eksklusibong pakighinabi sa Bombo Radyo Butuan, gipadayag ni Dra. Cardeño nga pinaagi unya sa maong molecular laboratory, maka-diagnose na sila sa mga posibleng sakit nga gihambin sa mga binuhing mananap sa mga mag-uuma sama sa baka, kabaw, kanding, baboy ug uban pa.
Ang mugawas matud pa nga resulta sa himuon nilang diagnosis maoy himuong basehan aron mapugngan ang pagkaylap unya niini sa ubang mga hayop ug ubang mga lugar sa rehiyon.
Gawas pa kini sa paghimo unya og mga palisiya o kaha executive order alang sa hingtungdang local government unit ingon man pagpagawas unya nila og pundo sa ingon matubag gilayon ang mga programang angayang aksyunan.
