BUTUAN CITY – Napalagpot na sa gahom ang primero ministro sa Pakistan nga si Imran Khan human napildi sa no-confidence vote ang iyang liderato.
Gihimo ang botohay sa lawom nga kagabhion human nagpalaban sa Korte Suprema ang mga opposition parties pinaagi sa giduso nilang mosyon batuk kaniya human ang pila ka adlaw nga drama.
Unang namugna ang maong mosyon batuk kang Khan ning mi-aging semana apan iya kining gibabagan pinaagi sa pag-dissolve sa parliamento.
Ang botohay gihimo human nagdesisyon ang Supreme Court pabor sa mga opposition parties dayong butyag nga unconstitutional ang gihimo ni Khan.
Tungod niini, si Khan na ang unang Pakistani prime minister nga gipalagpot pinaagi sa no-confidence vote.
Magtagbo ugmang adlawa ang parliamento aron magbotar og bag-ong lider sa ilang nasud.
