BUTUAN CITY – Anaa sa maayong kondisyon ang Agila nga nakuha sa usa ka mag-uuma sa Barangay Pangyan, Trento, Agusan Del Sur. Kini ang gikumpirma ni Jerome Albia, CENRO Bunawan-Agusan Del Sur sa eksklusibong pakighinabi ning sibyahan.
Sigon pa sa opisyal nga sa dihang nakuha ang agila niadtong Marso 31, naturn-over gelayon kini sa ilang opisina pasado alas 12:00 sa udtu og nadala ngadto sa Philippine Eagle Foundation sa Davao City pasado alas 9:00 sa gabii sa samang adlaw.
Sumala pa ni Albia nga anaa sa maayong kondisyun ang maong agila nga nikaon na matud pa og gihulat nalang nga hingpit nga makarekober adiser ibalik sa kalasangan.
Ang Babayeng Agila mitimbang kini og 4.5 kilos og dili pa hamtong.
Giklaro usab ni Albia nga aksidente ra kining nakuha sa maguumang si Rey Borlaza nga gitoohang dunay gigukod nga iyang kan-onon og didto nasulod sa lit-ag nga gibuhat sa mag-uuma.
Sa pagkakita matud pa ni Borlaza dali niya kining giluwas og gidala sa Barangay Kapitan aron maturn-over.
Padayon karun ang gihimong information education campaign sa Department of Environment and Natural resources kon DENR-Caraga sa kamahinungdanon nga maprotektahan ang Agila.
Sigon pa ni Cenro Albia nga nakig-alayon na sila sa lokal nga kagamhanan sa Trento, Agusan Del Sur aron motabang sa pagpahibalo sa katawhan mahitungod sa Philippine Eagle.
Samtang nagmugna usab kini og team kauban ang Barangay Pangyan alang sa gihimong monitoring.
Kini ilabina nga niadto pang 2019 nasigpatan nga dunay agila sa Barangay Pangyan og gitoohang duna pa kini mga kauban. Giawhag nalang sa opisyal ang katawhan nga kung dunay makitang agila ereport gelayon nila kini sa hingtungdang opisyal aron maturn-over ngadto sa ilang buhatan./
