BUTUAN CITY – Gi-turn over na sa kapulisan sa Bislig City, Surigao del Sur ngadto sa Regional Trial Court, Branch 42 , 10th Judicial Region nga nakabase sa Medina, Misamis Oriental ang kanhi Vice Governor sa Surigao del Sur nga si Librado Navarro, 64-anyos ug asawa niining si City Councilor Maylene, 47-anyos, parehong residente sa Ericson Subdivision, Brgy. Poblacion, human sila nadakpan kagabii tungod sa gi-atubang nilang duha ka ihap sa kasong syndicated estafa.
Sa eksklusibong pakighinabi sa Bombo Radyo Butuan, gipadayag ni PCapt. Carlos Villadore, deputy chief sa Bislig City Police Station nga ilang nadakpan ang magti-ayon pasado alas-10:30 kagabii sa may Sitio San Andres, Brgy. Maharlika, bitbit ang arrest warrant nga gi-isyu ni Judge Judy Sia Galvez sa kasong wala’y girekomendang pyansa alang sa ilang temporaryong kagawasan.
Hinuon, wala matud pa misukol sa arresting team ang magti-ayon rason nga hapsay silang nadala sa police station.
Sa ila matud pang siyudad, wala’y bisan usa nga mipasaka og pormal nga reklamo batuk sa kanhi gobernador kalabot sa susamang isyu bisan og duna’y nga nagrali kaniadto gawas sa ilang panimalay og mi-demand nga i-uli ang ilang kwarta.
Dungan kini sa pagklaro nga ang kaso, gipasaka sa mga reklamante didto lang sa korte sa Medina. Misamis Oriental.
Giklaro usab ni Capt. Villadore ng nadakpan sa Brgy. Maharlika ang mga suspek samtang naghimo og barangay visitation tungod kay midagan matud pa kini pagka-mayor sa ilang siyudad.
Gidakop sila pagpanguna ni chief of police Lt. Colonel Michael Lozada, uban sa mga personahe sa Surigao del Sur 1st Provincial Mobile Force Company.
