BUTUAN CITY – Ma-abtan pa og usa ka tuig adiser hingpit nga mabalik sa normal ang supply sa tubig ning siyudad sa Butuan tungod sa kadako sa damyos nga hatud sa bagyong Odette diha sa ilang water system ilabina sa mga dagkong tubo human kini natabunan og buhangin.
Atol sa gilusad nga hini-usang press conference kagahapon sa taga-Taguibo Aquatech Solutions Corporation kon TASC ug sa taga-Butuan City Water District kon BCWD, gipadayag ni TASC President Rondel Lagnada nga kinahanglan pa usab nilang i-rehabilitate ang kilid sa suba hangtud nga wala na’y balas nga musagol sa tubig nga maoy tuburan nila sa iprosesong water supply.
Apan taliwa niini nga problema, gipaningkamutan gihapon sa kadumalahan sa TASC nga makapasulod gihapon og ginagmay nga supply sa tubig aron lang duna’y mahatud ngadto sa BCWD kansa maoy ila usab nga iproseso alang sa ilang mga konsumidor.
Posible matud pang sa hinapos ning bulana pa mahuman ang pagtaud sa mga ihulip nga tubo rason nga dili pa nila ma-full blast ang pag-release sa tubig tungod sa posibilidad nga mu-uban unya pagsulod sa tubig diha sa tubo ang mga buhangin.
