BUTUAN CITY – Gibisitahan sa mga opisyales sa Dinagat Islands province si Tacloban City Mayor Alfred Romualdez, pila ka mga adlaw human gikuso-kuso sa bagyong Odette aron pagkuha og kahibalo kung gi-unsa nila pagbangon human gihapak sa bagyong Yolanda.
Sa eksklusibong pakighinabi sa Bombo Radyo Butuan, gipadayag ni Dinagat Islands Vice Governor Nilo Demrey Jr., nga sama sa ilang lalawigan human gihapak sa bagyong Odette, grabeng kadaut usab ang gibilin sa bagyong Yolanda sa Region 8 ilabina sa Tacloban City ug gikinahanglan nilang masayran ang mga paaging gihimo aron usab ilang masundog alang sa ilang paspas nga pagbangon.
Dugang sa besi-gobernador, gitudluan na sila ni Tacloban City Planning officer Janice Canta alang sa paghimo og executive plan alang sa tinguha nilang pagbangon nga maoy himuon usab nilang centerpiece.
Bisan og daghan sila’g nadawat nga mga ayuda apan mas gikinahanglan nila kung unsaon nila pagbarog uban sa tabang sa tanang nagpakabanang sector hinugndan nga ang nakuha nilang mgaf legislative measures maoy ilang gamiton ug ipagamit usab sa kasikbit nga lalawigan sa Surigao del Norte ug Surigao City nga apil sa grabeng gikuso-kuso ni Odette.
Apil sa ilang gipakisayran kung gi-unsa sa maong siyudad ug lalawigan sa Southern Leyte pagpabangon ang ilang turismo human giguba sa Yolanda apil na ang ilang mga negosyo.
Sunod nga adtuan sa grupo ang Philippine Coconut Authority kon PCA aron sayron usab nila unsaon pagbangon ang industriya sa lubi nga nahurot og kadamyos sa paghapak ni Odette.
