BUTUAN CITY – Dakong damyos nga gibilin sa pag-agi sa bagyong Maring dinhi sa dakbayan sa Butuan ilabina sa Brgy. Masao tungod kay napulo ka mga bunsod ang totally damaged uban sa 36 ka mga beach cottages ug usa ka balay ang nabanlas usab sa dagkong balud niadtong Sabado sa gabii.
Sa eksklusibong pakighinabi sa Bombo Radyo Butuan, gipadayag ni Brgy. Kagawad Felix Lariba nga apil sa 36 ka mga beach cottages ang unom nga gipanag-iyahan sa barangay ilabina nga mi-abot na sa dalan ang mga buhangin nga mugna sa padagko usab sa dagat nga mi-abot pa hangtud sa ilang suba rason nga duna usa’y mga na-apektuhang fish cages kondiin tungod sa kalubog sa dagat, ubay-ubay nga mga bangus ang nangamatay.
Dugang pa ni Kagawad Lariba, dakong damyos usab ang natala sa nagubang 10 ka mga bunsod tungod kay mugasto og kapin sa 200-mil pesos ang kada-usa niini.
Samtang padayon pa ang ilang gihimong assessment aron masuta ang kinatibuk-ang damyos nga hatud sa maong daut nga panahon. Ila usab nga ipa-abot ngadto sa city government ang nabanlas nga usa ka balay aron mahatagan na kini og ayuda.
Dugang pa ni Kagawad Lariba, ang kasikbit nilang Brgy. Lumbocan maoy duna’y mas daghang nadamyos nga kabalayan.
