BUTUAN CITY-Mi-epekto na kaganinang alas-12:01 sa tungang gabii ang pagpailalom sa intero probinsya sa Agusan del Sur sa Modified Enhanced Community Quarantine kon MECQ hangtud sa Septembre 10 ning tuiga.
Sa pakighinabi sa Bombo Radyo Butuan, gibutyag ni Alfredo Nonoc Plaza, ang tigpamaba sa provincial government sa Agusan del Sur nga kini gihimo tungod sa mga natalang daghang kaso sa mga nataptan sa COVID-19 sa probinsya.
Sigon ni Plaza ang maong lakang na-uyunan sa mga miembro sa Provincial Inter-Agency Task Force (PIATF) human sa gipatawag nga virtual meeting ni Governor Santiago ‘Santi’ Cane.
Ilalom sa MECQ restrictions sa Agusan del Sur, istriktong ipatuman ang curfew hours, pagdili sa pagtinda og mga ilimnong makahubog, pagbawal sa mga pagtapok-tapok sa mga tawo, pagbawal nga makagawas sa mga nag-edad 18-anyos paubos ug 65-anyos pataas ingon man kadtong mga adunay comorbidity, mabdos ug uban pa.
Tungod sa padayong pagsaka sa kaso sa COVID-19, gi-angkon ni Plaza nga punu-puno na sa mga pasayente ang mga nag-una nilang ospital ingon man ang mga quarantine ug isolation facilities.
Gikalabak-an karon nila kung asa ipangbutang ang mga pasyente higayong magpadayon og saka ang kaso sa COVID-19 sa probinsya.
Sa datos nga gipagawas sa Provincial health office as of kagahapong adlawa, mi-abot na sa 6,084 ang ilang kumpirmadong kaso diin sa maong ihap 1,077 ang pabiling aktibo samtang 4,842 ang nakarecover ug 165 na ang mga namatay.
Gi -angkon usab ni Plaza nga gawas sa problema nila sa pag-atiman sa mga nataptan sa virus, problema na usab sa probinsya ang kakulang sa ilang mga medical personnel human nang-surrender na matod pa ang ubang health workers lakip na niini ang mga nurse tungod sa lahi-lahing rason, dugang pa sa problema sa grabe ka nihit sa mga nurse nga mangaply.
Tungod niini sub-sub ang panawagan sa opisyal sa tanang AgSurnon nga motamod sa mga gipatumang restriksyon ug seryusohon ang giyera batok sa pandemya aron matabangan ang mga frontline health workers ug aron dili na usab mugrabe ang sitwasyon sa ilang probinsya
