BUTUAN CITY – Dili mu-ubos sa 10 ka mga lugar sa Dinagat Islands Province, apil na ang provincial capitol, ang connected na sa libreng Wi-Fi tungod sa pagpatuman sa Wi-Fi for All–Free Public Internet Access Program.
Sigon sa Department of Information and Communications Technology kon DICT Mindanao Cluster 2, gawas sa capitol, gihatagan usab og internet access ang mga municipal halls sa mga lungsod sa Basilisa, Dinagat, Cagdianao, Libjo, Loreto, San Jose, ug Tubajon; ug ang annex building sa Tag-Abaca National High School sa lungsod sa Basilisa; ingon man ang DICT Dinagat field office.
Dugang mga sites pa ang butangan og libreng Wi-Fi tungod kay ipadayon man sa DICT ang rollout sa proyekto. Gituyo kini aron mapaspasan ang mga online transactions sa local government units.
Tumong usab sa maong programa ang paghatag og mga oportunidad, edukasyon, impormasyon ug abilidad sa pagsalmot sa nagkadako nga digital economy sa pampublikong lugar sa tibuok nasud.
