BUTUAN CITY – Nubenta porsiento sa 912 ka mga membro sa Diamond Transport Service Cooperative kon DATSCO sa tibuok Caraga Region ang nawad-an og panginabuhian tungod sa pagpasagad matud pa sa ilang chairman nga si Jose Evads Lawenko.
Sigon ni Romeo Ednilan, ang panglangay-langay ni Lawenko pagpatawag og general assembly ang bugtong mabasol sa pagkasuspende karon sa operayon sa DATSCO tungod sa kahadlok nga mahulipan matud pa siya sa pwesto ug wala na’y laing pangwartahan pa.
Duna matud pa’y duha ka buwan nga sweldo sa mga empleyado apil na sa mga drivers ug marshals ang wala mahatag og kompleto ang sweldo tungod kay 10 ka adlaw lang ang gihatag ni Lawenko rason sa ilang pagdangop ngadto sa Department of Labor and Employment kon DOLE.
Gawas sa kawala’y klarong sweldo, wala pa usa’y nakuhang benepisyo ang maong mga empleyado sama sa pagkaltas pa hinuon sa ilang overtime pay ug wala pa’y nadawat nga 13th month pay ning miaging tuig.
Apan gibarugan ni Lawenko nga ang CDA ug ang LTFRB ang angayang basulon tungod sa wala pagsanong sa iyang hangyo nga lugwayan pa sila og usa ka buwan aron makapahigayon og general assembly human matud pa nabalda ang ilang upat ka mga eskedyol niini tungod sa pandemya.
Gipamugos pa niining dili matud pa sala sa DATSCO ang nadangatan nila karon tungod kay duna matud pa siya’y mga ebidensyang magpamatuod nga iyang gihimo ang mga angayang himuon aron lang magpadayon ang ilang operasyon.
Gihingusgan pa niini nga unta sabton ug tabangan sila tungod kay bunga matud pa sa proyekto sa kagamhanan ang ilang kooperatiba rason nga angayan lang hatagan og human consideration.
Dili matud pa sayon pangitaan og venue kung sila mag-asembliya ilabina nga dul-an sa usa ka libo ang ilang mga membro.
