BUTUAN CITY – Padayon pa ang pag-rescue sa mga opisyal sa Brgy. Los Angeles ning siyudad sa Butuan ngadto sa ilang mga residente sa Purok 7, 14 ug 16 kinsa apektado sa nagpadayong giyera tali sa kapulisan ug mga rebeldeng New People’s Army kon NPA.
Sa eksklusibong pakighinabi sa Bombo Radyo Butuan, gipadayag ni Kapitan Irene Monden nga nagsugod ang buto-buto sa mga armas kaganinang alas-dies sa buntag ug tungod sa kaduol ra sa lokasyon niini ngadto sa kabalayan, rason nga nanghikling ang kapin sa 200 na ka mga indibidwal.
Sa inisyal nga nasayran sa kapitan, duna matud pa’y pipila sa iyang mga residente ang na-angol ug kini karon ang ilang gisuta samtang gipakaon sa pani-udto ang mga namakwit.
Dili pa tugutan sa militar ang nasangpit nga mga residente pagbalik sa ilang pinuy-anan samtang wala pa ma-clear ang area gikan sa presensya sa walhong grupo.
Samtang gibutyag usab ni Analiza Ente, presidente sa Purok 7, nga sa ila lang Purok, gibana-banang mukabot sa 40 ka mga pamilya silang nanghikling.
Nag-iyahay na matud pa sila og kanaog sa sentrong bahin ilabina kadtong duna’y mga anak tungod sa kalisang.
Misamot matud pa ang ilang kalisang tungod kay nangabot na sa kalsada ang mga saag nga bala nga hapit pang mu-igo kanila.
Nahimo pa gihapon ni Riza Dolhera, residente sa Purok 14 sa Brgy. Los Angeles ang pagkatawa dihang iyang gisaysay ang ilang paghikling kaganina tungod sa sunod-sunod nga mga buto sa armas.
Gipadayag ni Dolhera nga sa sinugdanan mga alas-dies sa buntag, layo pa ang nadungog nilang mga buto nga panagsa lang hangtud nga nag-anam anam na kini kaduol ug nagsunod-sunod na.
Dinhi na matud pa sila nagdesisyon sa iyang mga ginikanan nga mukanaog na kondiin nakita pa nilang anaa na sa kalsada ang mga bala nga hapit pang mi-igo sa ilang gisakyang motorsiklo hinungdan nga hapit silang natumba apan padayon gihapon sa pagkanaog padulong sa sentrong bahin sa ilang barangay.
Samtang gi-asuy usab sa 75-anyos nga si Felipe Dano nga residente usab sa Purok 14 nga sukad sa iyang pagkatawo sa maong barangay, kini na ang ikaduhang higayong nga nakabakwit sila tungod sa giyera.
Dali matud pa nilang gipasulod sa ilyang asawa ngadto sa sementado nilang kwarto ang ilang mga apo aron masigurong dili ma-igo sa saag nga bala dayong desisyon nga muhikling na samtang wala pa ang kagabhi-on aron masiguro ang ilang kaluwasan.
