BUTUAN CITY – Nagmalumposon ang pinaka-unang same sex marriage sa Agusan del Norte nga gihimo usa ka pribadong resort sa Barangay Manapa lungsod sa Buenavista kagahapon sa hapon.
Gi-officiate ni Rev. CJ Agbayani sa LGBT Christian Church nga nakabase sa Quezon City ang holy union rite sa lesbian couple nga sila Sean ug Shana.
Sa eksklusibong pakighinabi sa Bombo Radyo Butuan, gipadayag ni Rev. Agbayani nga wala’y dautan sa pagpakasal ug paghigugmaay sa duha nga pareho ang gender dayong hangyo sa publiko nga respetohon ang ilang katungod diha sa kumunidad ug sa pag-avail sa susama niini nga seremonya.
Sumala ni Rev. Agbayani, dapat niadto pa untang Hunyo 18, ang pagpahigayon sa maong kasal apan tungod sa mga restrictions nga hatud sa COVID-19 rasong nauktaba kini.
Dugang pa niini, dapat ma-anad na ang mga tawo sa susamang sermonyas tungod kay dili lang kini ang katapusan nga adunay miembro sa LGBTQ+ Community nga kaslon sanglit ubay-ubay pa ang nakahan-ay niyang i-officiate sa umalabot nga mga buwan.
Ang kasal sa lesbian couple susama ra sa traditional nga kasal kondiin ang bride nakasuot og puti nga wedding gown samtang naka-Tuxedo usab ang groom kondiin gi-obserba usab ang social distancing ilabina sa mga mitambong.
Nasayrang kapin na sa usa ka libo ka mga LGBT couple ang gikasal ni Rev. Agbayani sa tibuok Pilipinas apan unang higayon pa lang kini sa Agusan del Norte ug ikalima sa tibuok northen Mindanao.
Samtang gibutyag usab niining duna sila’y representante sa LGBTQ partylist nga mudagan sa 2022 national elections sa tumong nga dunggon sa balay-balauranan sa nasud ang gihingusgan nilang civil union partnership.
