BUTUAN CITY – Sukwahi ang pamaagi sa paglubong kang Prince Philip kaysa kang Princess Diana kaniadto tungod kay niadtong 1997 dihang gilubong ang prinsesa, daghang mga tawo ang nag-atang na sa kadalanan alang sa pagpakita sa ilang pahasubo dihang gigawas na gikan sa Buckingham Palace ang patay’ng lawas ni Princess Diana.
Gibutyag ni Inday Aguiman direkta gikan sa United Kingdom ug lumad nga nagpuyo sa Surigao City sa eksklusibong pakighinabi sa Bombo Radyo Butuan nga kini tungod kay istrikto kaayo ang lubong kang Prince Philip kagabii oras sa Pilipinas tungod kay limitado lamang sa 30 ka mga tawo ang gitugutan pagsulod sa kapilya nga gilangkuban sa mismong royal family lamang ug mga higala.
Gani sa mismong Buckingham Palace walay gitugutan mga tawo nga magtapok sa sulod sa palasyo rason nga ang uban, igo na lang naghatud og bulak sa gawas.
Human sa paglubong sa Duke of Edinburg, wala matud pa’y laing storya si Queen Elizabeth tungod kay daan na matud pang nagtugon ang prinsipe nga walay himoong state funeral ang iyang lubong apan gipakita lang nila kini pinaagi sa live stream alang niadtong mga tawo nga gustong makakita sa paghatud sa pinaka-ulahi nga padulngan sa duke.
Tungod usab sa pag obserba sa minimum health protocols, lahi-lahi ang gisakyan sa matag royal family aron ma-obserba ang social distancing.
