BUTUAN CITY – Gila-umang makahatag og bag-ong paglaum sa kinabuhi sa usa ka ulitawong mikatkat sa taas nga bahin sa Magsaysay Bridge ning mi-aging gabii.
Una nang gipadayag ni FO1 Barry James Aurea sa Bureau of Fire Protection kon BFP-Butuan nga gilayon nilang girepondihan ang taho nga mikatkat sa tulay si Genisis Minoza, nanimuyo sa Purok-5, Brgy. Maon, aron matud pa magtubok.
Sumala sa barkada sa biktima, sa wala pa mahitabo ang pagkatkat, una na silang nag-inom niini sa ilang barangay dihang kalit na lang nga nawala hangtud nga ila na lang nasayran nga mikatkat na kini sa tulay.
Sumala pa adunay problema sa uyab ang biktima ug nakasinati pa og depression tungod kay nag-inusara na lang kini dinhi sa Butuan tungod kay atua na sa kauluhang Manila ang iyang pamilya ug nadugangan pa ang kawawala niini’y trabaho.
Nakamugna ug grabeng kahuot sa dagan sa trapik sa tulay og kasikbit nga kalsada ang maong panghitabo nga milungtad og kapin sa usa ka oras hangtud nga nakumbinse ni Kap. Vicente si Minoza nga mokanaog sa tulay dihang gihanyagan niya kini og trabaho rason sa malampusong pag-rescue.
Nasayrang dili lang kini ang unang higayon nga duna’y mikatkat padulong sa taas nga bahin sa tulay aron unta magtubok tungod kay sa sayong bahin ning tuiga, usa usab ka babaye ang mihimo og ingon niini human gibulagan sa apan nakumbinsi pagkanaog human gisa-aran sa iyang ka-ipon nga magbalik na sila alang sa kaayuhan usab sa ilang mga anak.
