BUTUAN CITY – Dili pa matumbok sa Local Disaster Risk Reduction and Management Office kon DDRMO sa Marihatag, Surigao del Sur ang tukmang damyos nga hatud sa bagyong Auring tungod kay nagpadayon pa ang ilang assessment ug wala pa usab mabalik ang linya sa ilang kuryente sa pagkutlo niini nga balita tungod sa pipila ka power lines sa ANECO nga natumba.
Sa eksklusibong pakighinabi sa Bombo Radyo Butuan, gipadayag ni MDRRMO chief Gerry Avila nga ang tanan nilang 12 ka mga barangay, apektado sa kataas sa tubig baha nga milapas na sa tawo kansa mao matud pa ang ilang pinaka-unang nasinatian.
Mi-abot matud pa sa 5,707 ka mga pamilya ang apektado niini apan 661 ka mga pamilya ang gihikling, base sa inisyal lang nilang listahan.
Sa ilang pinaka-ulahing assessment, mi-abot sa 106 ka mga balay sa ilang lungsod ang totally damaged ilabina kadtong anaa duol sa suba ug baybay samtang 72 usab ang partially damaged.
Hinuon, gitugutan na sa lokal nga kagamhanan ang ilang mga evacuees nga makapa-uli na sa ilang pinuy-anan tungod sa mimaayo na nga dagan sa panahon.
Tambag niini sa mga namakwit nga susihon una og maayo ang ilang pinuy-anan ilabina ang ilang electrical outlets aron masigurong luwas ang ilang pagpauli tungod kay siguradong nasudlan kini og tubig.
Mapasalamaton usab kini tungod kay taliwa sa kadaghan sa mga na-apektuhan, wala sila’y natalang casualty ilabina nga daghan sa ilang mga constituents ang nangatkat na sa atop sa ilang balay, mikatkat sa punuan sa mga kahoy ug lubi ug uban pang ilang kasak-an.
Maagi-an na usab ang ilang national highway nga una nang nalanapan sa lapad nga tubig-baha.
