BUTUAN CITY – Nag-deploy na sa ilang mga responders ang Municipal Disaster Risk Reduction and Management Office kon MDRRMO sa Barobo, Surigao del Sur aron monitoron ang mga low-lying areas mga posibleng mabahaan tungod sa pagbundak na sa kusog nga ulan nga hatud sa bagyong Auring.
Ning mi-aging adlaw, nag-isyu na si Barobo Mayor Joey Pama og memorandum nga nagsuspende sa trabaho sa tanang mga pribado ug pampublikong trabahuan aron makapangandam ang tanan sa paghapak sa bagyo.
Samtang karong adlawa usab, temporaryong gipasuspende hangtud ugmang adlawa Lunes, Pebrero 22, ni Mayor Pama ang operasyon sa tanan nilang mga otorisadong tourism destinations, beach resorts, floating cottages, ug uban pang nalambigit sa mga tourism-related activities.
Nakalatid sa gipagawas nga Memorandum Order No. 15 ni Mayor Pama nga kinahanglang mu-report ang mga tourism operators ngadto sa ilang Municipal Tourism Office higayong madamyos ang ilang mga propiedad tungod sa bagyong Auring.
