BUTUAN CITY – Duna na’y stranded nga mga pasahero ug mga rolling cargoes sa Port of Lipata ug sa Surigao City Port nga parehong sakop sa Surigao City human nagpagawas ang Philippine Coast Guard og ‘No Sail policy’ alang sa tanang mga sakyanang pandagat kagahapon sa alas-singko sa hapon.
Sa eksklusibong pakighinabi sa Bombo Radyo Butuan, gipadayag ni Philippine Coast Guard – Surigao City Station commander Elaine Pangalinan nga sa pagkakaron, duna na’y 174 ka mga rolling cargoes ug 848 ka mga pasahero ang stranded sa Port of Lipata samtang 18 ka mga rolling cargoes ug duha ka mga pasahero lang ang stranded usab sa Port of Surigao City.
Kadaghanan matud pa sa mga na-stranded anaa lang sa ilang mga sakyanan tungod kay kabahin man kini sa mga rolling cargoes samtang mga tawong sakay niini samtang ang ubang mga pasahero anaa sa terminal sa maong mga pantalan.
Higayong mataud-tauran, hatagan matud pa og pagkaon ang mga pasahero sa mga shipping lines ug nasabutan usab sa Surigao City government nga mutabang sila sa mga stranded nga pasahero.
Nasayod matud pa ang mga stranded nga pasahero sa sitwasyon karon ilabina nga kadaghanan kanila sayo pang na-abisuhan aron unta dili na mutabok gikan sa mga island municipalities sa Surigao del Norte apan duna’y uban nga ulahi nang nakahibalo rason nga naka-abot sila sa mainland Surigao aron unta mubiyahe sa ubang bahin sa nasud.
