BUTUAN CITY – Gideklarang persona-non-grata sa mga indigenous people’s representatives ning rehiyon sa Caraga ang ila rang katribong si Bayan Muna Rep. Eufemia Cullamat.
Sa eksklusibong pakighinabi sa Bombo Radayo Butuan, gipadayag ni Datu Rico Maca, secretary general sa League of Caraga Indigenous People’s Mandatory Representatives kon LCIPMR, alang kanila below-the-belt na ang gihimo sa kongresista ngadto kanila.
Sa sunod-sunod nga mga dayalogong ilang gihimo, gipadayag ni Datu Rico nga dinhi nila nakita nga sukad sa paglingkod sa representante diha sa kongreso, wala sila makadumdom nga duna kini naduso nga balaudnong maghatag unta og kaayuhan kanilang mga tribu sa Agusan del Sur, hinuon pulos lamang mga pabor sa rebeldeng grupong New People’s Army ang giduso niini.
Daghan pa usab sila og basehan nga magpamatuod nga dili ka-alyado sa gobyerno si Cullamat ug gikalimtan na ang sektor nga iyang girepresentahan nga mao ang mga tribo sa tibuok nasud.
Sa gidusong resolusyon nga gipirmahan sa mga Indigenous People’s Mandatory Representatives ning rehiyon, nakalatid nga partikular nilang gideklarang persona non-grata ang kongresista sa mga yutang kabilin sa Manobo, Mamanwa, Higaonon, Mandaya, Mandaya ug Banwaon indigenous cultural communities kon indigenous people’s ning rehiyon.
Ang pagpasagad matud pa ni Cullamat sa iyang trabaho maoy hinungdan sa pila ka dekada na nilang pag-antus sa manipulasyon, misrepresentation ug kagubot ng gihimo sa mga walhong grupo, mga teroristang grupo ug ilang mga supporters.
Dili usab matud pa mabasol sa mga kongresista ang ilang gihimong lakang kansa nasabtan usab sa mga anak niini .
Giklaro usab ni Maca nga wala’y naghulhog kanila nga himuon ang maong lakang apil na ang pagkondena sa Makabayan bloc tungod kay kaugalingon nila kining kabubut-on.
Hinuon, aminado kining midangop sila sa kasundaluhan aron tabangan sila sa ilang desisyon.
Tungod niini, ilang gi-awhag si Rep. Cullamat nga dili na magpa-ilang tribo, dili na magsuot og sapot sa tribu, ug dili na mu-anhi sa Caraga Region.
