BUTUAN CITY – Gidala ngadto sa Philippine Eagle Foundation kon PEF Facility sa Davao ang na-rescue nga Agila alang sa dugang test sama sa avian influenza og uban pang gikinahanglang tests.
Kini human nga gi-turn-over ang sub-adult Philippine Eagle nga gihatagan og ngalan nga “Balikatan” ni Mr. Ryan Orquina sa Bacuag, Surigao del Norte ngadto sa Department of Environment and Naural Resources kon DENR niadong Agosto 30, 2020.
Sumala ni Orquina napalit niya ang maong agila nga gikonsiderang endangered species gikan sa Indigenous People kon IP sa tribong Mamanwa kansa gikatahong nadakpan tulo ka semana na ang nakalabay sa kalasangang sakop sa Lahi, Sico-Sico, Camam-onan kon LaSiCam, Gigaquit og Alegria nga parte.
Sigon pa ni Orquina, ang iyang intensiyon sa pagpalit mao ang pagluwas sa agila sa posibleng pag-ihaw niini o kaha pagbutang niini sa tangkal. Ang pag-rescue og pagturn-over gisaksihan og giplastar sa mga personahe sa DENR CENRO Tubod – Conservation and Devt Section (CDS) gikan sa CENRO Tubod, Enforcement personnel gikan sa PENRO-SDN, DENR Caraga CDD-PABES Chief & Technical staff, team gikan sa Philippine Eagle Foundation og si Orquina kauban ang iyang pamilya.
Ang sub-adult Philippine Eagle, nga gibana-banang nagpangedaron sa 3 ngadto sa 4 ka tuig og lalaki, gipailalom sa physical check aron madetermina ang iyang health condition og gibutangan og tag sa PEF.
Miabot kini sa kabug-atong 3.8 kilos nga dunay katas-ong 92 sentimetros samtang ang kalapdon sa iyang pako muabot sa 182 sentimetros og ang sunog dunay katas-ong 10.4 sentimetros og tarsus nga ang taas 16 sentimetros. Hinoon gideklarang himsog ang maong agila.
