BUTUAN CITY – Gila-uman ni Senador Francis ‘Kiko’ Pangilinan nga tutukan ni Pangulong Rodrigo Duterte sa iyang ikalimang State of the Nation Address kon SONA ang pagsulbad sa dakong problema sa nasud sa COVID-19.
Sa eksklusibong pakighinabi sa Bombo Radyo Butuan, gipadayag sa senador nga ang Pilipinas lang sa mga nasud sa Southeast Asia ang padayong misaka ang kaso sa COVID-19 sukwahi sa uban sama sa Vietnam, Indonesia, South Korea, Taiwan, Singapore ug uban pa nga nag-anam pagkunhod ang ilang mga kaso apil na ang ihap sa mga namatay.
Kini matud pa ang gusto sa mga Fililpino, ang masiguro ang kaluwasan sa tanan gikan sa makamatay nga sakit.
Gani, gidugang sa senador nga tungod sa paspas nga pagsaka sa COVID-19 cases sa nasud nga karon, milapas na sa 80-mil, hapit na niini ma-apsan ang China diin unang nadiskubre ang maong coronavirus.
Tungod niini, gikabalak-an ni Senador Pangilinan nga sa pagtapos ning bulana, mu-abot na sa sien-mil ang matalang kaso niini sa nasud kung padayong wala’y tukmang solusyon nga himuon ang nasudnong kagamhanan.
Gila-uman usab sa senador nga masayran unta sa mga Filipino ang kongkretong plano sa gobyerno batuk sa makamatay nga virus.
Apan mas maayong matangtang na sa iyang katungdanan si Health Secretary Francisco Duque III tungod sa kawala niini nahimong tukmang lakang aron pugngan ang pagkaylap sa coronavirus.
Gani, kwestyunable usab ang kridibilidad sa kalihim tungod sa mga kahiwiang nadiskubrehan karon sulod sa PhilHealth ilabina nga ang kalihim ang Chairman of the Board sa maong ahensya.
