BUTUAN CITY – Excited nang mu-uli sa San Luis, Agusan del Sur si Shiela Mae España karong duha ka adlaw na lang ang iyang pa-abuton aron matapos na ang 14 ka adlaw niyang quarantine period didto sa kauluhan.
Si España, nagtrabaho sa Saudi Arabia kinsa giluwas sa mga empleyado sa Philippine Embassy human nangayo og tabang tungod sa dili maayong kasinatian sa mga kamot sa iyang amo.
Dihang gi-repatriate siya uban sa lain pang mga Pinoy, nahimong dakong babag sa iyang pagpa-uli ang iyang pagpositibo sa COVID-19.
Sa eksklusibong pakighinabi sa Bombo Radyo Butuan, gibutyag ni España nga bisan og laay, okey lang kini alang kaniya tungod kay alang man gihapon kini sa iyang kaayuhan ug sa iyang pamilya ilabina sa iyang mga anak.
Andam matud pa siyang mupa-ilalom sa swab test didto man sa kauluhan o kaha dinhi sa Butuan o sa ilang lungsod, maduol-duol lang siya sa iyang pamilya.
