BUTUAN CITY – Suportado sa Kapisanan ng mga Brodkaster ng Pilipinas kon KBP ang bisan unsa mang lakang nga himuon sa higanteng TV network nga ABS-CBN human hingpit nang gibasura kagahapon sa House Committee on Legislative Franchises ang sugyot ng maghatag unta sa ABS-CBN og 25-ka tuig nga prangkisa.
Sa botong 70 nga Yes, 11 nga No, 2 ka inhibit, ug usa ka abstain, gi-aprubahan sa mga miyembro ug ex-officio members sa komite ang resolusyon nga naglatid nga dili angayang hatagan og prangkisa ang ABS-CBN.
Sa eksklusibong pakighinabi sa Bombo Radyo Philippines kang KBP chairman Herman Z. Basbaño, gipadayag niining makasusubo ang desisyon sa komite taliwa nga kabahin na kini sa prosesong gi-agian niini.
Sigon ni Basbaño kinsa mao usa’y vice-president ug chief operating officer sa Bombo Radyo Philippines, dili lang kini makasusubo nga desisyon alang sa mga Filipino kondili apil na sa demokrasya sa nasud ilabina nga angayang hatagan ang publiko ug higayong makapili kung asa sila makakuha og balita, kalingawan ug edukasyon nga madugang sa ilang kahibalo.
Gidayeg pa ni Basbaño ang pag-angkon sa maong TV network nga dili sila perpekto sa ilang operasyon ilabina sa kamatu-urang duna sila’y kasaypanan, apan dili matud pa angayang kini ang himuong rason o basehan aron sirad-an ang maong kompanya.
Taliwa sa dakong hagit karon sa broadcast industry, gipanawagan sa opisyal ang tanang mga media entities nga ipadayon lang ang na-andan natong inadlaw-adlaw nga trabaho.
Kinahanglan usab nato ang pag-ampo aron maprotektahan ang atong industriya gikan sa mga ingon niini nga panghitabo. Kini ilabina nga gikinahanglan sa tanan ang tuburan sa tnang gikinahanglang impormasyon sa katawhan, kalingawan ug uban pang madalit sa mg anaa sa broadcast industry sa TV.
