BUTUAN CITY – Blangko pa ang Commission on Human Rights kon CHR-Caraga sa mga lakang nga himuon sa ilang sentrong buhatan batuk sa bag-ong Anti-Terrorism Act of 2020 kansa hugot nga gisupak sa katawhan.
Sa eksklusibong pakighinabi sa Bombo Radyo Butuan, gipadayag ni Atty. Euvic Ferrer, membro sa Legal Section sa CHR-Caraga, nga consistent na kaniadto pa ang komisyon sa pagpadayag sa ilang reservations kalabot sa maong balaud ilabina sa pipila ka mga probisyon niini, bisan niadtong gidebatihan pa kini sa kamara ug sa Senado.
Sigon ni Atty. Ferrer, nangita karon ang komisyon og nagkada-iyang mekanismo kalabot sa kung sa unsang paagi nila maproteksyunan ang civil liberties ug usa sa ilang gilantaw karon mao ang provisional remedies dungan sa pagsiguro nga dili sila mu-atras sa ilang investigative ug monitoring duties.
Sa kabahinan sa opisyal, gipadayag niini nga kung siya lang ang pabut-on, duna’y pipila ka mga probisyon sa bag-ong balaud nga dili angayang ipatuman partikular na ang pag-aresto sa usa ka tawong wala’y judicial warrant ug ang gisaligan lang mao ang kagahom sa anti-terrorism council higayong madudahan lang ang usa ka tawo tungod kay musangpot kini sa pagpangabuso.
Sa panahon matud pa nga duna na’y mga katungod nga malapas, siguradong dili isurender sa mga membro sa legal profession ang civil liberties ilabina kadtong nasulod sa 1987 Constitution.
Kini tungod kay sila matud pa ang tigpanalipod sa konstitusyon ug mga opisyal sa korte.
Welcome development alang kaniya ang paspas nga pagduso og petisyon sa mga korte batuk sa bag-ong balaud.
