BUTUAN CITY – Nag-atubang sa kasong paglapas sa RA No. 9165 kon Comprehensive Dangerous Drugs Act of 2002 ang tigpayuhot sa ginadiling drugas human kini nasikop sa buybust sa Montalban Street, Butuan City kagahapon sa alas 12:15 sa buntag.
Ang operatiba gikan sa Anti-narcotics sa Caraga Region nakasikop sa top 10 regional drug personality diin kapin sa 88-mil pesos nga shabu ang nakumpiska.
Giila ni PNP Caraga director Brigadier General Joselito T. Esquivel, Jr ang na-arestong suspect nga si Jeffrey C. Suberre, alyas Kano, 39-anyos nga residente sa Brgy. Ambago, ning siyudad.
Nakuha sa posisyon sa suspetsado ang tulo ka sachet sa gidudahang shabu nga mitimbang og 13 gramos nga dunay Dangerous Drug Board value nga 88-mil 400 ka pesos; lakip na ang 24 ka piraso sa tag-usa ka libo ka pesos isip buy bust money; cellular phone og motorcycle.
Natigayon ang law enforcement operation Butuan City Police Office og Philippine Drug Enforcement Agency 13 human sa pipila ka semana nga surveillance.
Base sa imbestigasyon, dinagko ang pagpamaligya sa suspect og ilegal nga drugas ngadto sa mga kustumer. Guskutodiya na sa Butuan City Police Station 1 ang dinakpan alang sa tukmang disposasyon.
