BUTUAN CITY – Bisan pa man sa hulga sa coronavirus disease 2019 kon COVID-19 sa nasud, wala pa gihapon mihunong ang lokal nga kagamhanan paghatag og ayuda sa mga apektadong sektor sa lungsod sa Trento, Agusan del Sur.
Gipa-ubos man sa Modified General Community Quarantine kon MGCQ ang quarantine classification sa nasangpit nga lungsod, naglisud pa gihapon sa pagpamasada ang tricycle drivers ug aron matubag ang uban nilang panginahanglan, midawat og tag-usa ka sakong bugas ang 946 ka mga tricycle drivers kansa mao na ang ikaduhang hugna sa rice subsidy sa lokal nga kagamhanan karung buwan sa Hunyo.
Ang ayudang bugas sa mga drivers, base sa listahan sa Municipal Business Permit and Licensing Office ug parehong naka-renew sa ilang Permit to Operate alang ning tuiga.
Samtang gawas sa mga tricycle drivers, midawat usab og tag-lima ka piso ang kapin 600 ka benepisyaryong mag-uuma nga nag-atiman og manok sa ilang mga nataran.
Sa tabang sa Municipal Agriculture Office sa Trento, Agusan del Sur gipanghatag sa Provincial Veterinary Office ang mga piso nga“Basilan” ug “Dekal” sa mga mag-uumang rehistrado sa ilang asosasyon isip “Crisis Intervention Program” batuk sa kalisud nga hatud sa kasamtangang pandemya.
Sumala ni Dr. Konnielou Verdin, anaa sa 7-milyones pesos ang gigahin nga pondo sa Agusan del Sur Provincial Veterinary Office sa pag-apod-apod og mga piso ngadto sa 14 ka local government units sa tibook probinsya ug lakip niini ang lungsod nga Trento.
