BUTUAN CITY – Nagsugod na ning adlawa ang public transport sa pipila ka bahin sa Caraga Region human nga gipa-ilalom na sa general community quarantine sa Inter-Agency Task Force for the Management of the Emerging Infectious Diseases kon AITF-EID.
Apan sa eksklusibong pakighinabi sa Bombo Radyo Butuan, gipadayag ni Ma. Kristina Cassion – officer-in-charge kon OIC regional director sa Land Transportation, Franchising and Regulatory Board kon LTFRB-Caraga nga sa pagkakaron, limitado pa ang yunit nga namasada tungod kay padayon pa ang pagkuha og special permit sa mga operators diha sa ilang buhatan.
Sa pagkakaron, lakip sa mga lugar nga duna’y nagbiyahiang van ang rutang Butuan ug Kitcharao, Agusan del Norte ug vice versa samtang mga DATSCO units usab ang nagbiyahian sa rutang Carmen. Agusan del Norte ug Butuan City ug vice versa gawas pa sa mga intra-city routes ning siyudad.
Mala-umon ang opisyal nga mabuksan na sa labing daling panahon ang mga terminals alang sa mga bus units samtang gasunod gihapon health protocols nga gipatuman ubos sa general community quarantine kon GCQ nga mga lugar aron duna na usa’y mubiyaheng mga sakyanan.
Giklaro usab sa opisyal nga wala’y individual public vehicle nga gitugutang mag-operate kondili kadto lang accredited sa kooperatiba ug mga korporasyon isip pagsunod sa nakalatid sa Memorandum Circular No. 2020-770 nga gipirmahan sa mga board members.
Subling giklaro sa opisyal nga dili pa pasudlan ang Surigao del Sur tungod sa tinguhang mas pakusgan pa ang ilang kampanya batuk sa COVID-19 gawas lang sa Surigao del Norte nga duna na’y gitugutang lugar nga mamahimong mabiyahian partiukular adtong kutob lang sa terminal sa Bad-as, sa lungsod sa Placer.
