BUTUAN CITY – Wala tuyuang mabulgar sa ere ang problema sa usa ka overseas Filipino worker nga gikuhaan unta og situationaire report sa Bombo Radyo sa sitwasyon nila karon sa Syria nga apil sa na-igo sa COVID-19 pandemic.
Sigon ni Maritess Olorbida-Pantonal a eksklusibong pakighinabi sa Bombo Radyo Butuan, lumad nga taga-Nasipit, Agusan del Norte ug magduha ka tuig nang nagtrabaho isip domestic helper sa Sabura Villa Noor, Damascus, Syria, bisan og naka-lockdown usab ang ilang nasud apan makalihok-lihok gihapon sila.
Abli pa usab ang mga malls ug supermarkets apan kutob na lang sa alas-kwatro sa hapon sukwahi niadtong wala pa ang pandemic diin gabii na sila manira.
Samtang sa pinuy-anan sa iyang amo, dili matud pa mawad-an og mga alcohol ug mga disinfectants aron pagseguro nga mapatay ang coronavirus sa palibot.
Apan dihang gikumusta na ang iyang sitwasyon ug ang pagtratar sa iyang amo, dinhi na siya nagbutyag nga ang iyang among babaye nga si Manar Nasser Bashour usa ka negosaynte og ambassador usab sa maong nasud.
Dismayado siya tungod kay taliwa nga opisyal kini sa gobyerno apan dili kini magtinundo paghatag sa iyang sweldo rason nga wala na usab siya’y klaro pagpadala og kwarta sa iyang anak didto sa lungsod sa Nasipit.
Gani niadtong tuig 2019, duna pa siya’y kuha-unong walo ka buwan nga sweldo samtang wala pa usab siya maswelduhi karong tuiga.
