BUTUAN CITY – Gipa-ilalom na sa community quarantine ang lalawigan sa Agusan del Sur subay na sa Executive Order No. 13-20 Series of 2020 nga gipirmahan ni Gov. Santiago ‘Santi’ Cane aron magpundo una sa balay ang mga tawo ug mugawas lang kung dunay importanteng paliton sa merkado sama sa pagkaon ug medical supplies.
Alayon niini, imontar ang 24-hour PNP/Military checkpoint sa entry ug exit points sa probinsya uban ang mga health personnel apil na ang pagpatuman sa curfew hour gikan sa alas-dies sa gabii ngadto na sa alas-kwatro sa kaadlawon.
Makabiyahe pa gihapon ang mga de-pasayru-ang sakyanan sulod lamang sa teritoryo sa Agusan del Sur apan ang public ug private vehicles nga gikan sa laing probinsya dili na makasulod sa lalawigan.
Magpadayon usab ang class suspension apil ang mga school activities sa tanang ang-ang sa mga pambubliko ug pribadong tunghaan.
Gitugutan gihapong maka- operate ang mga restaurants, malls, health & wellness facilities, sports and recreation facilities basta ipatuman lang ang disinfection protocols.
Niining panahuna hugot usab nga ipatuman ang price freeze kondiin buot pasabot dili mamahimong makapataas sa presyo sa mga nag-unang palaliton.
