BUTUAN CITY – Aron masiguro ang kaluwasan sa mga Dinagatnons gikan sa makamatay nga COVID-19, nagpagawas si Governor Kaka Bag-ao og Executive Order No. 03-004, Series of 2020 nga nagdili kon nagpugong sa pagpasulod sa tanang local ug foreign vessels aron malikayan ug makontrola ang pagkaylap sa COVID-19 sa Dinagat Islands province.
Kini isip pagsunod sa Presidential Decree nga nagdeklara og State of Public Health Emergency sa nasud.
Apil sa mga dili tugutan nga makasulod sa territorial waters sa Dinagat Islands epektibo ugmang adlawa, Miyerkules hangtud nga tangtangon na ang state of public health emergency ang tanang mga foreign vessels; ingon man ang tanang fishing vessels nga dili rehistrado o wala’y permit gi kan sa mga local government units sa Dinagat Islands; apil na ang tanang mga pasahero ug mga cargo vessels gikan sa mga lalawigan nga gawas sa Dinagat Islands ug Surigao del Norte.
Apan wala’y labot niini kadtong duna’y importanteng katuyuan alang sa mga construction ug infrastructure projects nga gi-committ na sa Provincial Government sa maong isla.
Nakalatid usab sa EO nga dili pakana-ugon ang tanang mga tripolante ug pasahero sa mga barko samtang ang paghimo sa mga cargo handling operations, sama sa pagdawat, pag-handle, pagkustodiya, security, ug delivery sa cargo himuon lang sa mga arrastre operators.
Gitambagan usab ang tanang mga lokal ug langyawng turista nga wala’y pinuy-anan o kaha wala magtrabaho sa Dinagat Islands pagbiya na ugmang adlawa Marso 18.
