BUTUAN CITY – Wala nay panimalay nga ulian ang pamilyang Cadavero sa may Purok-5, Barangay Patin-ay, Prosperidad, Agusan Del Sur human kini gilamoy sa kalayo samtang nangaligo sila og dagat kagahapon.
Sa pakighinabi sa Bombo Radyo Butuan, gibutyag ni SFO2 Melbourne Dumanon sa Bureau of Fire Protection kon BFP-Prosperidad, nga alas-10:14 kagahapon sa buntag dihang girespondihan nila ang sunog nga mi-ulbo sa panimalay ni Prudencio Cadavero nga napalong paglabay sa 26 minutos kondiin gibana-banang muabot sa 14-mil pesos ang damyos sa maong panimalay.
Sigon pa ni Dumanon, nagsugod sa kusina nga bahin ang mi-ulbong kalayo.
Bisan og nagpadayon pa ang imbestigasyon aron matumbok ang hinungdan sa pag-ulbo sa kalayo samtang gitu-uhan sa opisyal nga basin tungod kini sa wala na-ibot nga nakasaksak nga appliances o kaha wala napalong nga gihaling sa abuhan.
