BUTUAN CITY – Mukabat sa P289-M pondo ang gigahin sa Philippine National Police (PNP) para sa ilang procurement sa mga body camera nga gamiton sa ilang mga police operations kabilang na ang operasyon sa iligal nga droga.
Sumala kang PNP OIC PLt. Gen. Archie Francisco Gamboa, gi-award ang bidding sa EVI Distribution, usa ka kumpanya sa San Juan sa contract price nga mukabat sa kapin sa P288-milyon apil na ang taxes, duties, maintenance og data system. Sumala kang Gamboa, magpahigayon ang NHQ-Bids ang Awards Committee sa asessment sa performance security og final evaluation sa system adiser ipagawas ang supply contract og purchase order sa kasamtangang tuig.
Sigon ni Gamboa, ang mga body cameras, kabahin sa usa ka sistema nga nagtugot sa “real time streaming” para sa mas epektibong data control og monitoring sa mga police operations. Apil usab sa system ang tanang connectivity systems, accessories, video management software, computer servers, og data storage para sa mga body cameras.
Magtukod usab ang PNP og National Management and Monitoring Center nga konektado sa 17 ka Regional Monitoring Centers, og 81 Provincial Monitoring Centers kon PMCs) og manduan sa PNP Information Technology Management Service, para sa pag-monitor sa mga live feeds gikan sa mga body cameras. Ang maong lakang kabahin sa giduso sa PNP nga “Smart policing” nga gamit ang teknolohiya aron mas epektibong pagpatuman sa misyon sa pulisya.
