BUTUAN CITY – Gipadayag sa usa ka Butuanong soft tennis player nga ang init nga suporta kaniya sa mga kababayang Filipino ang naghatag kaniya ug dakong kompyansa aron mahimong ganado sa pagdula sa soft tennis resulta sa pagkasakmit niya sa bulawang medalya sa nagpadayong 30th SEA Games.
Sa ekslusibong pakighinabi sa Bombo Radyo Butuan, gipadayag ni Joseph Arcilla – team captain sa Philippine Soft Tennis Men’s Team, dakong bentaha nga dinhi sa nasud gipahigayon ang SEA Games tungod kay personal nga mabati sa mga magdudula ang suporta sa mga Filipino nga maoy naghatag og inspirasyon kaniya tungod kay daw duna siyay kauban nga nagdula sulod sa korto.
Gipadayag usab sa atleta kinsa gipanganak sa Langihan ning siyudad sa Butuan, mibati siya og pressure human ni-abot sa higayon nga nag-agad kaniya ang mamahimong dagan kung makapadayon sa next round ang Soft Tennis Men’s Team.
Tumang kalipay ang iyang gibati human malampusong gidumala ang dula aron makasulod sa next round nga walay pildi ug maka-angkon og tsansa sa gold medal event.
Pag-abot sa doubles finals, dili matukib ang gibati niining kalipay uban ang iyang partner human nila gilupig ang ka-agbat nga Thailand 2-1 hinungdan sa pagkasakmit sa bulawang medalya.
Alayon niini nagpasalamat si Arcilla sa tanang nag-ampo ug misalig kaniya dungan sa panawagan sa mga batan-on ug mga minyo nga ipadayon ang pangandoy nga maka-apil sa Philipine Teams.
Sa maong team matud pa siya nahimong disiplinado, ma-ampingon sa kaugalingon ug naglikay sa makadaut nga mga bisyo.
Nasayran unang naila si Arcilla sa dulang lawn tennis diin nahimo kining word No.3.
Mupauli siya dinhi sa syudad sa umaabot nga Pasko.
