BUTUAN CITY – Gihunong na ang house-to-house ‘Sabayang Patak Kontra Polio’ sa Sitio Zapanta Valley sakop sa Brgy. Bangayan, Kitcharao, Agusan del Norte human ang palpak nga pagbanhig sa armadong mga tawo ngadto sa mga polio vaccinators ning mi-aging adlaw. Kini ang gikumpirma ni Dr. Jose Llacuna Jr., regional director sa Center for Health Development kon CHD-Caraga.
Sa eksklusibong pakighinabi sa Bombo Radyo Butuan, gibutyag ni Dr. Llacuna nga na-trauma ang ilang mga personaheng sakay sa Innova dark grey human gipabuthan og gipa-arakan sa gidudahang mga rebeldeng New People’s Army kon NPA dihang pa-uli na unta gikan sa ilang gihimong polio immunization.
Tungod niini, daling nakigtigom ang opisyal ngadto sa maong mga polio vaccinators sa nasangpit nga lungsod uban kang Mayor Arostitle ‘Oloy’ Montante og ilang nasabutan ang pagmontar og fix point aron ang mga barangay officials na lang ang musundo sa mga batang wala pa nabakunahan.
Gibutyag sa opisyal nga dihang mikanaog ang maong mga vaccinators gikan sa ilang paglusad sa unang hugna sa polio vaccination kagahapon, 97-porsiento na sa mga bata sa maong lugar ang napatakan sa polio vaccine tungod kay ang uban milangyaw sa laing lugar.
Nanghinaut na lamang si Jr. Llacuna nga dili na kini ma-usab ilabina nga paglusad na usab nila sa ikaduhang hugna sa maong vaccination sa Enero 20 ngadtu sa Pebrero 2 sunod tuig 2020. Nanghinaut usab siya nga unta masabtan sa mga responsable sa pagpapamanhig nga maayo ang katuyuan sa ilang mga sakop alang sa proteksyon sa maayong panglawas sa kabataan.
